အာဏာသိမ်း စစ်အုပ်စု၏ တရားမ၀င်ရွေးကောက်ပွဲနှင့်
တရားမဝင် မြန်မာသတင်းမီဒီယာကောင်စီ(MPC) ပတ်သက်၍ ထုတ်ပြန်ကြေညာချက်။
ရက်စွဲ၊ ၂၀၂၅- ခုနှစ်၊ ဩဂုတ်လ (၈) ရက်။
(၁) အာဏာသိမ်း မြန်မာစစ်တပ်(စစ်အုပ်စု)သည် အုပ်ချုပ်ရေးအသစ်ကို ထပ်မံဖွဲ့စည်းပြီး ၎င်းတို့ စိတ်တိုင်းကျ ရွေးကောက်ပွဲကိုကျင်းပရန် စီစဉ်ခြင်းမှာ မြန်မာ့ဒီမိုကရေစီဖွံ့ဖြိုးရေးအတွက် အကျိုးမရှိ ဘဲ နိုင်ငံတော်အာဏာကို လွှမ်းမိုးရန် နှင့် စစ်အုပ်စု သက်ဆိုးရှည်ရေးအတွက်သာ ရည်ရွယ်နေကြောင်း စစ်အုပ်စုလက်အောက်ခံ ရွေးကောက်ပွဲကော်မရှင်က ဆဌမအကြိမ် ပြင်ဆင်သော လွှတ်တော်အသီးသီး ၏ ရွေးကောက်ပွဲဆိုင်ရာဥပဒေများတွင် အထင်အရှား တွေ့မြင်ရသည်။
(၂) ၎င်းရွေးကောက်ပွဲနှင့်ပတ်သက်၍ အာဏာသိမ်း စစ်အုပ်စုမှ ကြေညာထားသော ပါတီစုံဒီမိုကရေစီ အထွေထွေရွေးကောက်ပွဲများကို နှောင့်ယှက်ဟန့်တား ဖျက်ဆီးခြင်းမှ ကာကွယ်ပေးရေးဥပဒေသည် လွတ်လပ်စွာ ထုတ်ဖော်ပြောဆိုခွင့်နှင့် သတင်းမီဒီယာလွတ်လပ်ခွင့်တို့အား ပြင်းထန်စွာ တားမြစ်ထား သည်ဟု လွတ်လပ်သော မြန်မာသတင်းမီဒီယာကောင်စီ (Independent Press Council Myanmar – IPCM) အနေဖြင့် သုံးသပ်သည်။
(၃) စစ်အုပ်စု၏ ဥပဒေအခန်း (၆)တွင် ရွေးကောက်ပွဲပျက်ပြားရန် ဟောပြောခြင်း၊ စည်းရုံးလှုံ့ဆော် ခြင်း၊ ဆန္ဒပြခြင်းနှင့် စာရေးသားဖြန့်ချိခြင်း မလုပ်ရဟု တားမြစ်ထားသည်။ ဖောက်ဖျက်ပါက ငွေဒဏ် နှင့် ထောင်ဒဏ် ၃နှစ်မှ ၇နှစ်အထိ ချမှတ်နိုင်ပြီး လူသေဆုံးမှုအထိ ဖြစ်ပွားလျှင် သေဒဏ်ချမှတ်မည် ဖြစ်ကြောင်း ဖော်ပြထားခြင်းမှာ လွတ်လပ်စွာ ဆန္ဒထုတ်ဖော်ပြောဆိုခွင့်ကို ချိုးဖောက်ထားသလို အများပြည်သူကို ခြိမ်းခြောက်ရာလည်းရောက်သည်။
(၄) ဇူလိုင် ၃၀ရက်နေ့တွင် စစ်အုပ်စု အသက်သွင်းခဲ့သည့် ဆိုက်ဘာလုံခြုံရေးဥပဒေသည်လည်း မြန်မာ ပြည်သူတို့၏ ဒစ်ဂျစ်တယ်အခွင့်အရေး (Digital Rights) အား ချိုးဖောက်ခြင်း၊ နိုင်ငံရေးအတိုက်အခံများ ကို စောင့်ကြည့်ထောက်လှမ်းခြင်းနှင့် သတင်းမီဒီယာသမားများ၊ တိုင်းရင်းသားပြည်သူများ၏ လွတ်လပ်စွာ ထုတ်ဖော်ရေးသားဖြန့်ချိခြင်းကို အရေးယူနိုင်ရန်အတွက် လုပ်ပိုင်ခွင့်ကို ချဲ့ထွင်ထားသော ဥပဒေဖြစ်၍ IPCM အနေဖြင့် ပြင်းထန်စွာ ကန့်ကွက်သည်။
(၅) အရေးပေါ်ကာလ ပြီးဆုံးသွားပြီဟု အာဏာသိမ်း စစ်အုပ်စုက ဆိုနေသော်လည်း ယခင် အမျိုးသား ဒီမိုကရေစီအဖွဲ့ချုပ် အစိုးရလက်ထက် ပြဌာန်းခဲ့သော ”နိုင်ငံသားများ၏ ပုဂ္ဂိုလ်ဆိုင်ရာ လွတ်လပ်မှုနှင့် ပုဂ္ဂိုလ်ဆိုင်ရာလုံခြုံမှုကို ကာကွယ်ပေးရေးဥပေဒ ”ပါ အခွင့်အရေးများ ဆက်လက်ရုပ်သိမ်းခံထားရပြီး စစ်အုပ်စုက မည်သူကိုမဆို အချိန်မရွေး၊ နေရာမရွေး ဝင်ရောက် ဖမ်းဆီးစစ်ဆေးခွင့် ပေးထားဆဲဖြစ် သည်။
(၆) ထို့အပြင် စစ်အုပ်စုလက်အောက်ခံ မြန်မာသတင်းမီဒီယာကောင်စီ(MPC) သည် စစ်ခေါင်းဆောင် များ၏ အကျိုးစီးပွားအတွက်သာ ကိုယ်စားပြုလုပ်ဆောင်နေပြီး အကျဉ်းထောင်များထဲတွင် မတရား ဖမ်းဆီးခံထားရဆဲဖြစ်သော မြန်မာသတင်းသမား ၃၇ဦး၏ အကျိုးစီးပွားကိုလည်းကောင်း၊ လွတ်လပ်သော မြန်မာသတင်းမီဒီယာများ၏ အကျိုးစီးပွားကိုလည်းကောင်း ကိုယ်စားပြုခြင်းနှင့် လွတ်လပ်လုံခြုံစွာ သတင်းရေးသားထုတ်လုပ်ခြင်းကို ကာကွယ်ပေးခြင်း မရှိပေ။ သို့ဖြစ်ပါ၍ MPC ၏ မီဒီယာဆိုင်ရာ ချိတ်ဆက်လုပ်ဆောင်မှုများနှင့် အကျိုးဆက်များကို IPCM အနေဖြင့် အသိအမှတ်မပြုဘဲ ကန့်ကွက် ရှုတ်ချပါသည်။
(၇) အထူးသဖြင့် အာဏာသိမ်းစစ်အုပ်စုသည် ၎င်းတို့ချုပ်ကိုင်ထားသော မြန်မာသတင်းမီဒီယာ ကောင်စီ (MPC)မှတဆင့် ၎င်းတို့၏ ရွေးကောက်ပွဲအစီအစဉ်ကို လွတ်လပ်မျှတနေသယောင် အိမ်နီးချင်းနိုင်ငံ များ၏ သတင်းအဖွဲ့အစည်းများ၊ သတင်းမီဒီယာကောင်စီများထံ စေလွှတ်ပြီး ကြိုးစားစည်းရုံးနေခြင်း မှာ မြန်မာနိုင်ငံ၏ လွတ်လပ်သောသတင်းမီဒီယာများအတွက် စိန်ခေါ်မှုကြီးဖြစ်ကြောင်း ဒေသတွင်းနှင့် နိုင်ငံတကာရှိ သတင်းမီဒီယာမိတ်ဖက်များထံ အသိပေးလိုပါသည်။
(၈) လွတ်လပ်သောမြန်မာသတင်းမီဒီယာကောင်စီ (Independent Press Council Myanmar- IPCM) သည် လွတ်လပ်သော မြန်မာသတင်းမီဒီယာဌာန ၄၀ ၊ တသီးပုဂ္ဂလ မြန်မာသတင်းသမားများ၊ မီဒီယာ ကျွမ်းကျင်သူများ၊ ဥပေဒပညာရှင်များဖြင့် စုဖွဲ့ထားပြီး သတင်းမီဒီယာလွတ်လပ်ခွင့်၊ လွတ်လပ်လုံခြုံစွာ သတင်းရယူနိုင်ရေး၊ သတင်းမီဒီယာကျင့်ဝတ်ကို လိုက်နာကျင့်သုံးရေးနှင့် မြန်မာ့သတင်းမီဒီယာဖွံ့ဖြိုး ရေးကိစ္စရပ်များအတွက် ကိုယ်စားပြုကာ ရပ်တည်ဆောင်ရွက်နေသော တရား၀င် သတင်းမီဒီယာ ကောင်စီ ဖြစ်ကြောင်း ထုတ်ပြန်ကြေညာအပ်ပါသည်။
အလုပ်အမှုဆောင်ကော်မတီ
လွတ်လပ်သောမြန်မာသတင်းမီဒီယာကောင်စီ (IPCM)
ဆက်သွယ်ရန်-
နန်းဖော့ဂေ (ဥက္ကဌ) – ၀၉၂၆၀၆၇၆၃၁
တိုးဇော်လတ် (အတွင်းရေးမှူး) – ၀၈၀၆၈၃၄၂၄၀
